ویب ڈیسک:وفاقی وزیر برائے خزانہ سینیٹر محمد اورنگزیب برطانیہ کے تین روزہ سرکاری دورے پر لندن پہنچ گئے ہیں، لندن کے ہیتھرو ایئرپورٹ پر برطانیہ میں پاکستان کے ہائی کمشنر ڈاکٹر محمد فیصل اور دیگر اعلیٰ حکام نے ان کا پرتپاک استقبال کیا۔
وزیر خزانہ کے اس دورے کا بنیادی مقصد پاکستان اور برطانیہ کے درمیان اقتصادی تعلقات کو مزید مضبوط بنانا، پاکستان میں غیر ملکی سرمایہ کاری کو فروغ دینا، اور برطانوی سرکاری عہدیداران، عالمی مالیاتی اداروں اور کاروباری رہنماؤں سے ملاقاتیں کرنا ہے۔
سینیٹر محمد اورنگزیب اپنے دورے کے دوران ’’پاکستان ایکسیس ڈے‘‘کے عنوان سے ہونے والی ایک اہم سرمایہ کاری گول میز کانفرنس میں شرکت کریں گے، جس کا اہتمام برطانیہ کی معروف انویسٹمنٹ بینکنگ فرم جیفریز کر رہی ہے۔
مزید برآں، وزیر خزانہ برطانیہ میں انفارمیشن ٹیکنالوجی کے شعبے سے وابستہ سرمایہ کاروں کے ساتھ ایک علیحدہ گول میز اجلاس میں بھی شریک ہوں گے، جس میں مصنوعی ذہانت، کان کنی، اور صحت کے شعبوں میں پاکستان میں موجود کاروباری مواقع پر توجہ مرکوز کی جائے گی۔
